Missie en doel

Die Gereformeerde Teologiese Akademie is ‘n instelling wat deur die Gereformeerde Kerke in Suid-Afrika (GKSA) opgerig is vir teologiese onderrig. Ons missie is om gelowiges toe te rus met ‘n diepgaande begrip van Gereformeerde teologie, gewortel in die onfeilbare Woord van God. Ons streef daarna om predikante, kerkleiers en lidmate voor te berei om Christus se kerk te dien met kennis, wysheid en toewyding. Gelei deur ons leuse, “Stuur u lig en u waarheid”, is ons verbind tot die handhawing van die gesag van die Skrif, die bewaring en bevordering van Gereformeerde teologiese tradisies, die bevordering van geestelike groei en praktiese bedieningsvaardighede, en die aanpak van hedendaagse uitdagings deur ‘n Bybelse wêreldbeskouing.

Ons Grondslag en Stigting

Die GTA aanvaar die onfeilbare gesag van die Woord van God en onderskryf die Drie Formuliers van Eenheid omdat hulle met God se Woord ooreenstem. Die GTA se opleiding is gewortel in Gereformeerde beginsels, met klem op die Woord, belydenis, kerk en bediening. Van elke werknemer en dosent word vereis om die Drie Formuliere van Eenheid te onderskryf.

Die GTA is huidig nie in Suid Afrika geakkrediteer nie, en bied nie-geakkrediteerde kortkursusse aan wat in vennootskap met ‘n gereformeerde akademiese seminarium in Amerika toegang gee tot ‘n MA graad wat internasionaal erken word.

Die kortkursusse wat die GTA aanbied is diepgaande en van uitnemende akademiese gehalte. Elke kursus word deur vakkundiges plaaslik en internasionaal gevalueer. DIt is kundig saamgestel om ‘n deeglike en omvattende opleiding te bied vir iemand wat geroepe voel om as predikant opgelei te word.

Akkreditasie en Internasionale Vennootskap

‘n Unieke geleentheid het homself voorgedoen deur ‘n ooreenkoms van Akademiese Samewerking met die Puritan Reformed Theological Seminary (PRTS) in Grand Rapids, Michigan, VSA te sluit. PRTS onderskryf die Drie Formuliere van Eenheid en die Westminster-Belydenis en is geakkrediteer deur die Kommissie vir Akkreditasie van die Vereniging van Teologiese Skole (ATS) in die Verenigde State en Kanada. Die staat in Amerika en Kanada akkrediteer oor die algemeen nie kerklike teologiese onderwys nie, die ATS doen dit.

Hierdie vennootskap laat kwalifiserende GTA-studente toe om in te skryf vir PRTS se MA-graadprogram. PRTS erken die nie-geakkrediteerde kerk-spesifieke teologiese onderrig wat deur die GTA aangebied word, en laat studente toe tot die PRTS se MA-program in Teologie. Die ooreenkoms stel die GTA in staat om sy eie akademiese program te ontwikkel terwyl inhoud van PRTS gebruik word. PRTS evalueer die akademiese kwaliteit van GTA-kursusse en endoseer dit om erkenning binne sy akkreditasievoorwaardes te verskaf. Studente wat die program suksesvol voltooi (minimum vyf jaar) ontvang ‘n internasionaal erkende MA-graad wat deur PRTS toegeken word. Hierdie MA-graad, anders as ‘n tipiese MDiv, is ‘n oorgangsgraad wat ontwerp is om toegang te verleen tot nagraadse studies soos ThM- en PhD-programme.

Die vennootskap bied GTA-studente ook toegang tot PRTS se aanlyn biblioteek.

Programstruktuur en Kurrikulum

Die GTA se opleiding is ‘n saamgestelde program wat binne ‘n enkele raamwerk gelewer word. Dit bestaan uit drie kwalifikasies oor vyf jaar, gevolg deur ‘n sesde jaar wat deur die GKSA se teologiese skool vir kandidaat-predikante van die GKSA aangebied word.

• Jaar 1: Bied ‘n Sertifikaat in Gereformeerde Teologie. Dit verskaf ‘n grondslag in Bybelse en kerk-verwante vakke, saam met teologiese lees- en skryfvaardighede. Hierdie studie-eenhede is ook individueel beskikbaar vir enigiemand wat teologiese verryking of beter toerusting vir diens soek. In 2025 bestaan dit uit 10 kort leerprogramme, wat na verwagting in 2026 sal uitbrei na 12.
• Jare 2-5: Die Sertifikaatprogram word opgevolg met ‘n vierjarige Lisensiaat-program, bestaande uit kort leerprogramme wat deur die GTA ontwikkel word en deur dosente wat deur die GKSA se Kuratorium goedgekeur is, aangebied word. Hierdie Lisensiaat bestaan uit 26 leereenhede.
• Jare 3-5: Vanaf die derde jaar word studente ingeskryf vir die MA-graad by PRTS wat gelyktydig met die lisensiaatprogram aangebied word. PRTS verskaf 50% van die MA-kursuswerk, en die GTA verskaf die ander 50%. Aan die einde van die vyfde jaar van studie by die GTA, ken PRTS die MA-graad toe, en die GTA erken suksesvolle voltooiing van die program deur die Lisensiaat in Teologie toe te ken.
• Jaar 6: ‘n Verdere jaar van opleiding volg vir studente wat predikant in die GKSA wil word, aangebied deur die Teologiese Skool van die GKSA, en wat afsluit met die Kandidaatsertifikaat wat deur die Teologiese Skool toegeken word.

Die kurrikulum, goedgekeur deur die Kuratorium, is gebaseer op die Gereformeerde beginsel van Woord, belydenis, kerk en bediening. Dit is gestruktureer in vier hoofvakgroepe:

• Tale: Grieks en Hebreeus.
• Bybel: Ou en Nuwe Testament, insluitend eksegese, Inleiding, Bybelse Teologie, en Bybelse Hermeneutiek.
• Belydenis: Die Drie Formuliere van Eenheid, die Drie Katolieke Belydenisse, Dogmatiek, Apologetiek, en Etiek.
• Bedieningsvakke: Ekklesiologie, Kerkgeskiedenis, Kerkorde, Gereformeerde Liturgiek, Homiletiek (prediking), Pastorale Sorg, Kategetiek (onderrig), en Evangelisasie (Evangelie aan die Nasies).

Behoorlike aandag word gegee aan die Gereformeerde kerkorde en kontekstuele onderwerpe soos “Christus in Afrika”. Die kurrikulum word beskou as ‘n lewende dokument.

Struktuur en Bedryf

Die GTA word bestuur deur ‘n Direktoraat, wat tans uit agt lede bestaan (vier aangestel deur die Kuratorium van die GKSA en vier kundiges op bepaalde gebiede). Die Kuratorium van die GKSA het volle toesig oor die klasse, sillabus en studiegidse, en dien as moderators en eksaminatore. Die Kuratorium keur ook die kurrikulum goed. Die kandidaatsudente wat predikante in die GKSA wil word, word deur die Kuratorium toegelaat en registreer by die Teologiese Skool van die GKSA. Ander studente wat die hele opleiding of dele daarvan wil neem, skryf direk by die GTA in op ons webblad.

Die akademie het ‘n klein voltydse personeel, insluitend die prinsipaal en registrateur, ondersteun deur ‘n span dosente wat vakspesialiste is en deur die Kuratorium van die GKSA goedgekeur is.

Klasse word huidig hoofsaaklik aanlyn in die aande aangebied en word opgeneem vir asinchrone toegang. Hoewel die huidige studente meerendeels Afrikaans is, word Engelse vertolking verskaf, met planne vir tegnologiese oplossings soos KI-vertaling.

Die GTA het ‘n virtuele kampus en gebruik plekke soos Aros en die Teologiese Skool-gebou in Potchefstroom vir potensiële byeenkomste en toekomstige kontakklasse. ‘n Hibriede model word beplan, insluitend kontaksessies en skole (somer, winter, herfs). Studente het toegang tot ‘n digitale biblioteek en IT-ondersteuning.

Die GTA het op 3 Februarie 2025 begin met die opleiding van sy eerstejaarstudente. Soos aan die begin van 2025 is daar 55 studente, insluitend 8 kandidaatstudente van die GKSA.

Vir wie is dit?

Die GTA verwelkom ‘n diverse reeks individue. Ons kursusse is ontwerp vir:

• Aspirant-predikante: Diegene wat deur die Kuratore toegelaat is tot predikante-opleiding in die GKSA, en individue wat ‘n roeping tot die bediening oorweeg.
• Kerkleiers: Ouderlinge en diakens.
• Kerkadministrateurs: Personeel wat kerkdokumente voorberei.
• Ouers: Diegene wat Christelike opvoeding vir hul kinders wil verbeter.
• Beroepslui in Verwante Velde: Insluitend onderwysers, beraders, joernaliste, regspraktisyns, sielkundiges, maatskaplike werkers, ens., waar teologie hul werk kan verdiep.
• Aktiewe Kerklede: Gemeentelede, kategete, Bybelstudieleiers, en enigiemand wat belangstel in persoonlike groei en diens in die kerk.

Toelatingsvereistes sluit oor die algemeen ‘n Matriek met vrystelling of ‘n ekwivalente kwalifikasie in, of erkenning van vorige leer. Studente van diverse ras- en taalagtergronde word sonder onderskeid verwelkom.